Fondun icraçı direktoru Mehman İsmayılov Azərbaycan İlahiyyat İnstitutunun Qəbələ rayonunda təşkil etdiyi “Qış məktəbi”ndə gənclər qarşısında çıxış edib

Foto qalereya / Xəbərlər / Tehsil 05-02-2020 15:00 150

Azərbaycan İlahiyyat İnstitutunun (Aİİ) Qəbələ rayonunda təşkil etdiyi “Din, mədəniyyət və cəmiyyət-2” mövzusunda “Qış məktəbi”ndə tələbələr üçün seminarlar keçirilib.
Seminarda iştirak edən Mənəvi Dəyərlərin Təbliği Fondunun icraçı direktoru Mehman İsmayılov “Dəyişən dünyada milli-mənəvi dəyərlər” mövzusunda tələbələr qarşısında çıxış edib. Mehman İsmayılov bildirib ki, xalqımızın mənəvi dünyasını zənginləşdirən, tariximizi və mədəniyyətimizi ucaldan milli dəyərlərimiz Azərbaycanın yüksək əxlaqi xüsusiyyətlərinin təcəssümüdür. M.İsmayılov qeyd edib ki, dünya xalqları arasında öz qədim milli-mənəvi dəyərləri ilə tanınan Azərbaycan xalqı yaşatdığı və təbliğ etdiyi bəşəri ideyaları, adət-ənənələri, milli xüsusiyyətləri ilə dünya mədəni irsində özünəməxsus yer tutur. Azərbaycan xalqının minillər boyu adət-ənənələrinə sadiq qaldığını, bu dəyərlərin uzun illər əvvəl formalaşdığını vurğulayıb. İcraçı direktor daha sonra nəzərə çatdırıb ki, dəyərlərimizi qorumaq milli kimliyimizi hifz etmək, onların təbliği isə mədəniyyətimizin təbliği deməkdir.
Bakı Beynəlxalq Multikulturalizm Mərkəzinin (BBMM) Analitika şöbəsinin müdiri Rəşad İlyasov “Azərbaycanın multikulturalizm modeli” mövzusunda çıxış edib. R.İlyasov qeyd edib ki, Azərbaycanda 35-dən çox etnik qrup mövcuddur. Təsadüfi deyildir ki, bu baxımdan, Azərbaycan, həm də “etnoqrafiya muzeyi” adlandırılır. Multikulturalizm elmi ədəbiyyatında “multikultural vətəndaşlıq” və “konstitusional vətəndaşlıq” terminləri mövcuddur. Bu, birbaşa multikulturalizmin Azərbaycanda həyat tərzi və dövlət siyasəti olması kontekstində də açıqlana bilər. Azərbaycan multikulturalizminin ədəbi-bədii və fəlsəfi-publisistik qaynaqları elmi şəkildə sübut edir ki, ölkəmizin multikulturalizm modeli burada məskunlaşmış etnosların birgəyaşama mövcudluqlarını təmin edir.
Xatırladaq ki, fevralın 7-nədək davam edəcək “Qış məktəbi”nin təşkilində əsas məqsəd tələbələrin dünyagörüşünün zənginləşdirilməsi, onların ölkəmizdə mövcud multikultural, tolerant mühitin canlı şahidi olmalarıdır.