Mingəçevirdə “Mənəvi dəyərlər sistemində Nəsimi fenomeni” mövzusunda tədbir keçirilib

Foto qalereya / Dəyirmi masa / Xəbərlər 09-04-2019 16:28 60

Aprelin 9-da Mənəvi Dəyərlərin Təbliği Fondunun təşkilatçılığı ilə Mingəçevir şəhərində “Mənəvi dəyərlər sistemində Nəsimi fenomeni” mövzusunda dəyirmi masa keçirilib. Tədbirdə Mənəvi Dəyərlərin Təbliği Fondunun (MDTF) icraçı direktorunun müavini Rəfi Qurbanov, Dini Qurumlarla İş üzrə Dövlət Komitəsinin (DQİDK) Yevlax bölgəsi üzrə şöbəsinin müdiri Natiq Əfəndiyev, Bakı Dövlət Universitetinin (BDU) türk xalqları ədəbiyyatı kafedrasının müdiri, professor Ramiz Əsgər, Mingəçevir Şəhər İcra Hakimiyyəti başçısı Aparatının İctimai-siyasi və humanitar məsələlər üzrə şöbəsinin müdir müavini - dini qurumlarla işin təşkilatçısı Sahib Əliyev, müəllim və tələbə kollektivi iştirak ediblər.
Tədbiri giriş sözü ilə açan DQİDK-nın Yevlax bölgəsi üzrə şöbəsinin müdiri Natiq Əfəndiyev ölkə Prezidenti cənab İlham Əliyevin 2019-cu ili "Nəsimi ili" elan etməsinin önəmindən danışaraq bildirib ki, bu il çərçivəsində Mənəvi Dəyərlərin Təbliği Fondu tərəfindən silsilə tədbirlər həyata keçirilir.
Daha sonra çıxış edən Fondun icraçı direktorunun müavini Rəfi Qurbanov diqqətə çatdırıb ki, dəyərlər sisteminin formalaşmasında xalqın yaşadığı coğrafi məkan, dil, din, ədəbiyyat, incəsənət və s. xüsusi rol oynamışdır. Bununla yanaşı R.Qurbanov Azərbaycanda mədəniyyətlərarası münasibətlərin qarşılıqlı hörmət əsasında formalaşmasında əsrlər boyu çulğalaşmış qəbuletmə, hörmət, müxtəlif mədəniyyət nümunələrini qoruyub saxlamaq kimi ənənələr mühüm rol oynayıb.
BDU-nun türk xalqları ədəbiyyatı kafedrasının müdiri, professor Ramiz Əsgər Nəsimi yaradıcılığından geniş söhbət açıb. O, qeyd edib ki, 650 illik fəlsəfənin bu günədək qorunub saxlanılması Azərbaycan xalqının yüksək inkişaf etmiş mədəniyyətinin təzahürüdür. Ramiz Əsgər bununla yanaşı Nəsimi yaradıcılığının milli ruh və kimliyimizin formalaşmasında xüsusi yerinin olduğunu vurğulayıb. O, çıxışında Nəsimi yaradıcılığının gələcək nəsillərə düzgün təbliğinin vacibliyini diqqətə çatdırıb.
Tədbirin yekununda iştirakçıları maraqlandıran suallar cavablandırılıb.